Direktoratet for naturforvaltning har ansvar for fleire program for overvaking i ferskvatn, som hovudfinansiør eller som bidragsytar til andre etatar sine overvakingsprogram. Som direktorat under Miljøverndepartementet har vi hovudansvaret for å overvake naturmiljøet og biologisk mangfold i Noreg.
Dei fleste overvakingsprogramma er retta mot konkrete problemstillingar og særskilde miljøpåvirkingar, eller har som formål å registrere effekten av gjennomførte tiltak. Eksempel på dette er programmet for overvaking av sur nedbør og effektkontrollen for kalking. Alle program vil samtidig bidra til den generelle oversikten over miljøtilstanden i ferskvatn.
Nokre overvakingsprogram er knytta til internasjonale forpliktingar som Noreg har, med obligatoriske og regelmessige rapporteringar til internasjonale fora som Det europeiske miljøbyrået (EEA) og ESA. Overvaking knytta til EU sitt rammedirektiv for vatn er eit døme på det.
Samla sett skal overvakinga i ferskvatn gje eit bilde av den generelle utviklinga av miljøtilstanden i norske vassdrag og innsjøar. Vi arbeider for betre og meir effektiv overvaking, og det er i særleg grad behov for betre overvaking av biologiske forhold i ferskvatn. I samband med gjennomføring av EU sitt rammedirektiv for vatn i Noreg samarbeider vi og Klima- og forureiningsdirektoratet om utvkling av eit omfattande overvakingsprogram for ferskvatn og kystvatn.
Åpne VannmiljøBedre formidling av overvakingsresultat er eit viktig satsingsområde. Alle overvakingsdata frå ferskvatn vil bli registrert i fagsystemet Vannmiljø og allment tilgjengeleg gjennom Internett.
