Vann-Nett er eit nettbasert kartverktøy som blir brukt i samband med vassforskrifta. Vassforvaltinga skal vurdere miljøtilstanden og dei menneskeskapte påverknadene knytte til miljømålet om god økologisk tilstand i vassdrag, kyst og grunnvatn, og informasjonen skal registrerast i Vann-Nett.
Opne Vann-Nett Systemet er ope for allmenta, og det er innsyn i data ned på nivå med kvar enkelt innsjø, delar av vassdrag og kystvassførekomstar.
Vann-Nett har ei eiga løysing som viser statistikk over miljøtilstanden og effekten av ulike påverknadsfaktorar på følgjande nivå: heile landet, vassregionar, fylkeskommunar, kommunar og vassførekomstar.
Det er miljøforvaltinga og Noregs vassdrags- og energidirektorat (NVE) som eig Vann-Nett, men systemet er stasjonert hos og blir drifta av NVE.
Vassforskrifta stiller krav til medverknad i faglege vurderingar, avgjerder og gjennomføring av tiltak for å oppnå god miljøtilstand i vatnet. Vann-Nett sikrar faglege institusjonar, interessegrupper, myndigheiter og allmenta tilgang på miljøinformasjon og gir dei samtidig høve til å komme med innspel til arbeidet til vassforvaltinga.
Miljødata som er tilgjengelege i Vann-Nett, skal danne grunnlag for å planleggje og gjennomføre tiltak i vassdrag, kyst og grunnvatn.
I Vann-Nett er vassdrag, kystvatn og grunnvatn delte inn i geografisk avgrensa vassførekomstar. Vassførekomstane er einingar som kan forvaltast, og det blir knytt informasjon om miljøtilstand, påverknader og miljømål til kvar enkelt førekomst for å gi eit heilskapleg bilete.
Vassforvaltinga vurderer miljøtilstanden etter økologiske kriterium, som mellom anna førekomsten av fisk, vassplantar, plankton, næringssalt og miljøgifter. I Vann-Nett finn du informasjon om miljøtilstanden for kvart av desse temaa.
I Vann-Nett finst òg informasjon om alle kjende menneskeskapte påverknader og verknadene av desse, saman med ei vurdering av utviklinga i vassførekomsten knytt til målet om god miljøtilstand.
Vann-Nett blir brukt som verktøy for å rapportere miljødata til ESA. Systemet er tilpassa den europeiske databasen for miljødata i vatn, Water Information System for Europe (WISE). Formålet er å sikre at dataa blir registrerte i ei form som er tilpassa krava som blir stilte til rapportering i vassdirektivet.
Du kan få fram ulike temakart i systemet, basert på data henta inn frå databasane til andre etatar og saksområde. Mellom anna kan du få innsyn i Direktoratet for naturforvaltning sine data om bestandstatus for laks og om verneområde.
Systemet viser overvakingsnettverket som er tilknytt arbeidet under vassforskrifta, og du kan hente ut kart som viser miljøtilstanden og påverknadsfaktorane i eit område.
Vannmiljø er miljøforvaltinga sitt system for å lagre overvakingsdata i vatn. Vann-Nett og Vannmiljø leverer informasjon til kvarandre som ledd i arbeidet med å bestemme miljøtilstanden i vassførekomstane.
Informasjon som er knytt til den fysiske inndelinga i vassførekomstar, blir henta inn frå Vann-Nett for å knyte overvakingsdata til kvar definerte vassførekomst. Under prosessen med å vurdere miljøtilstanden blir overvakingsdata henta frå Vannmiljø til Vann-Nett som grunnlag.
Oppdatert: 16.12.2010
